Hasieratik ari gara Hernaniko Udalak abiatutako Hernani Burujabe Hernani Burujabe herri proiektu bat da, herriko ehun ekonomiko, sozial eta administratiboa barnebiltzen dituen trantsizio ekosozialerako alternatiba praktiko bat.

Egungo eredu ekonomiko xahutzaile, ekologikoki jasanezin eta ezberdintasun sortzailearen aurrean, alternatiba bizigarri, iraunkor eta parekide bat martxan jarri nahi du Hernani Burujabek, justizia sozial eta ekologikoa eta planifikazio eredu publiko-ekonomiko-komunitarioa ardatz hartuta.

Hernanin martxan den egitasmoa tokiko garapen burujabean oinarritzen da. Esan nahi baita, estrategikotzat jotzen diren esparru guztiei ahalak eman nahi dizkie bertan antolatzeko, sustapen publikoaren bidez, planifikazio komunitarioan eta kudeaketa kooperatiboan oinarrituta garatu daitezen.

Hernani Burujabe proiektua 2021ean jarri zen martxan. Bideo hau sortu genuen proiektua bere osotasunean azaltzeko.

Herrilur ekoizleen produktuak merkaturatzea eta kontsumitzea sustatzea helburu duen taldea da. Horretarako hainbat sentsibilizazio ekintza egiten dituzte, hala nola etxaldeetara bisitak, sukaldaritza erakustaldiak, dastaketak, etab. Herrilurren helburua hernaniarren elikadura-beharrak Hernanin ekoizten diren elikagaien bidez asebetzea eta lehen sektorearen biziberritzea eta indartzea dira.

Ekhi moneta Hernaniko egitura ekonomikoa artikulatu eta lurraldetzeko tresna nagusietako bat da. Bertako salerosketak lurraldeko agenteen artean egitea ahalbidetu eta sustatzen du eta herrian sortzen den aberastasuna herritik ihes egitea ekiditen du.

Hernani Burujabe herri-proiektua plazaratu zenetik urte bat bete zela eta, hilabete horietan egin ziren urratsen balantzea egin zuten proiektuaren baitan sortu diren sektoreetako ordezkariek.

Hernanin zaintza komunitarioak sustatzeko programa publikoa da Auzozaintza, eta herriko auzoetan egin ziren programa honen aurkezpenak.